Улс төр


Э.Бат-Үүл: Эдийн бус хохирлоо мөнгөн хэлбэрээр нэхэмжилнэ

5 жил TIMES.MN
 Нийслэлийн Засаг дарга Э.Бат-Үүл өөрийг эрүүгийн болон эрүүгийн байцаан шийтгэх хуульд заагдсан байдаг онц хүнд гэмт хэрэгт холбогдуулан гүтгэн, гүжирдэж байгаа учир хууль, шүүхийн байгуулагад хандах болсноо мэдэгдлээ


  Тэрбээр “НИТХ дахь МАН-ын бүлэг намайг огцруулах асуудлыг НИТХ-д тавьсан. Энэ үйл ажиллагаатай зэрэгцээд намайг санаанд багтамгүйгээр, хүний ёсноос гадуур гүтгэн, гүжирдэх кампанит ажил өрнөөд байна. Эрүүгийн болон эрүүгийн байцаан шийтгэх хуульд заагдсан байдаг онц хүнд гэмт хэрэгт холбогдуулан гүтгэн, гүжирдэж байгаа юм.

  МАН-ын бүлгийн дарга н.Амарбаясгалангийн хэвлэлд өгсөн ярилцлага дээр “410 тэрбум төгрөгөөр Засаг дарга гараа угаасан” гэж бичсэн байна. Энэ нь асар их хэмжээний мөнгийг шамшигдуулсан гэсэн үг. Вэб сайтуудад өгсөн ярилцлагадаа “Бат-Үүл шиг их хэмжээний мөнгөөр гараа угааж байгаа хүн цөөхөн шүү” гэсэн байгаа юм. Мөн хүүгийнхээ компанийг 5.1 тэрбум төгрөгийн өртөгтэй тендерт ялуулсан гэж ярьсан байна. Асар их хэмжээний мөнгийг албан тушаалаа ашиглан шамшигдуулсан тухай гүтгэлэг хийж байгаа юм. Тиймээс би Эрүүгийн болон Эрүүгийн байцаан шийтгэх тухай хуулийн дагуу холбогдох хууль хяналтын байгууллагад хандаж, гомдол гаргана. Дээрээс нь энэ гүжир, гүтгэлгийг маш их хэмжээгээр цацаж, надад болон миний гэр бүлд эдийн бус хохирол учруулсан учраас шүүхэд нэхэмжлэл гаргаж энэ хохирлоо мөнгөн хэлбэрээр нэхэмжилнэМиний зөвлөх, хуульчдын баг мөнгөн дүнг гаргахаар ажиллаж байгаа. Ирэх долоо хоногт  хэдээр үнэлэхийг тодорхой болгоод надад танилцуулна. 

Түүнчлэн хэвлэл мэдээллийнхэн, цахим ертөнцөд байдаг  жиргээчид, фэйсбүүкчидээс  мэдээллийг тэнцвэртэй явуулаач ээ гэж хүсмээр байна. Би хувьдаа ажил амждаггүй болохоор твиттер, фэйсбүүк  ашиглаж мэддэггүй. Ийм технологийн боломжийг ашиглаж гүжир, гүтгэлэгийг зохион байгуулалттай тарааж байна. 

Манай хүү МУ-ын иргэн Үндсэн хуулиар олгогдсон эрхийнхээ хүрээнд хувиараа бизнес эрхэлдэг.Бизнесийн үйл ажиллагаанд нь төрийн алба хашиж байгаа миний бие аль болохоор оролцохгүй байхыг хичээдэг. Ер нь оролцдоггүй. Амгалангийн 12 дугаар хороонд хэрэгжсэн дахин төлөвлөлтийн уралдаанд манай хүү оролцож шалгарсан. Энд нэг зүйлийг тодотгож хэлэхэд би шийдвэр гаргахад оролцдоггүй. Тус хорооны иргэдийн саналаар дахин төлөвлөлт хэрэгжүүлэх компани шалгардаг. Шалгараад ирсэн компанийг журмын дагуу би албажуулдаг. Тухайн үед  улс төрийн мушгин гуйвуулах үйл ажиллагаанд өртөөд байсан учраас би тухайн хорооны иргэд дээр очоод өөр компани сонгооч ээ гэж уулзаж байсан. Иргэд хүлээж аваагүй. Мөн АТГ-т энэ нь ашиг сонирхлын зөрчилтэй эсэхийг шалгуулахаар хандаж, зөрчилгүй гэсэн шийдвэрийг гаргасан байдаг” гэлээ.




Холбоотой мэдээлэл